超級博士蛙戰士進軍香港

近期大量新股殺到，其中凍資逾千億元既消費新股博士蛙(01698) ，掛牌首日就大升四成，抽到既散戶真係笑到見牙唔見眼，唔單止咁，瑞銀仲話，博士蛙由此成為全球市值最大的兒童消費品企業， 同時也成為上海近五年來海外上市的最大企業，認真威水。博士蛙見香港投資者咁支持，實行一不做二不休，董事局主席兼總裁鐘政用話，打算明年下半年進軍香港及珠三角地區，而家已經著手進行渠道整合，保守估計，博士蛙未來幾年的銷售增長率將在五成左右。

不過咁，散戶睇好佢地隻股，並唔代表鍾意佢地既產品。由於國內同香港，方言和習俗都唔同，佢地既宣傳手法，香港人未必接受到。好似博士蛙咁， 佢地會按每季既銷售表現，評選出Top Sales哥哥同姐姐，除左有獎金同證書外，仲有個特別既稱號，叫做「超級博士蛙戰士」，呢個雷霆萬鈞既名，聽落好堅咁，但對香港人來講，似乎得啖笑多啲。